གནས་ཡུལ། མདུན་ངོས། གསར་འགྱུར།
 
 
ཀྲོང་ཡན་གྱིས་ལྷ་ས་གྲོང་ཁྱེར་གྱི་དམངས་གཉེར་དཔལ་འབྱོར་འཕེལ་རྒྱས་ཀྱི་གནས་ཚུལ་ལ་བརྟག་ཞིབ་གནང་བ།
སྤེལ་དུས།2019-09-18   ཡོང་ཁུངས་།ཀྲུང་གོའི་བོད་ཀྱི་གསར་འགྱུར་དྲ་བ།   རྩོམ་པ་པོ། བདེ་སྐྱིད་བུ་ཁྲིད་ཀྱིས་བསྒྲིགས།
       དམངས་གཉེར་དཔལ་འབྱོར་འཕེལ་རྒྱས་ལ་སྐུལ་འདེད་བཏང་ནས་ཚོང་འགུགས་མ་འདྲེན་གྱི་སྲིད་ཇུས་དོན་འཁྱོལ་ལ་སྐུལ་འདེད་གཏོང་ཆེད། ཚེས་16ཉིན་གྱི་སྔ་དྲོ། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། རང་སྐྱོང་ལྗོངས་སྤྱི་དབང་མིན་པའི་ལམ་ལུགས་དཔལ་འབྱོར་གྱི་འགོ་ཁྲིད་ཚོགས་ཆུང་གི་ཙུའུ་ཀྲང་བཅས་ཡིན་པའི་ཀྲོང་ཡན་གྱིས་ལྷ་ས་གྲོང་ཁྱེར་གྱི་དམངས་གཉེར་ཁེ་ལས་ཁག་གཅིག་ཏུ་ཕེབས་ཏེ་འདྲི་རྟོགས་གནང་བ་རེད།
       བོད་ལྗོངས་ཧྭ་ཏུང་ཆུ་གློག་སྒྲིག་ཆས་ཆ་ལག་ཚད་ཡོད་ཀུང་སི་དང་། མཚོ་སྔོན་ཁྲོང་ཤིན་ལས་གྲྭ་བློ་འདྲི་མ་རྐང་ཚད་ཡོད་ཀུང་སི་བོད་ལྗོངས་ཡན་ལག་ཀུང་སི། བོད་ལྗོངས་ལན་ཙེ་འཛུགས་སྐྲུན་རྒྱུ་ཆ་ཚན་རྩལ་ཚད་ཡོད་ཀུང་སི་བཅས་སུ་ཀྲོང་ཡན་གྱིས་ཀུང་སིའི་གཉེར་སྐྱོང་དང་། ཡོང་འབབ། འཕེལ་རྒྱས། ལས་ཞུགས་སྐུལ་ཁྲིད་བཅས་ཀྱི་གནས་ཚུལ་བཀའ་འདྲི་ཞིབ་ཕྲ་གནང་བ་དང་འབྲེལ། ས་ཆ་དངོས་སུ་ལས་སྒྲུབ་གནང་ནས་ཀུང་སི་གསུམ་གྱི་འཕེལ་རྒྱས་ལ་འཕྲད་པའི་གནད་དོན་མཐུན་སྦྱོར་དང་ཐག་གཅོད་ཀྱང་གནང་བ་རེད། ཁོང་གིས་དམངས་གཉེར་དཔལ་འབྱོར་གྱིས་གྲོང་ཁྱེར་དང་གྲོང་གསེབ་ཀྱི་དཔལ་འབྱོར་དར་རྒྱས་གཏོང་བ་དང་། ནོར་སྲིད་ཡོང་འབབ་མང་དུ་གཏོང་བ། སྤྱི་ཚོགས་ཀྱི་ལས་ཞུགས་རྒྱ་ཆེར་གཏོང་བ། མི་དམངས་ཀྱི་འཚོ་བ་ལེགས་སུ་གཏོང་བ་སོགས་ཐད་ནུས་པ་གལ་ཆེན་ཐོན་ཡོད་པས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཚད་མཐོའི་མཐོང་ཆེན་བྱེད་ཀྱི་ཡོད།
       རིམ་པ་ཁག་དང་སྡེ་ཚན་ཁག་གིས་དབང་ཆ་འདྲ་མཉམ་དང་། གོ་སྐབས་འདྲ་མཉམ། སྒྲིག་ལམ་འདྲ་མཉམ་བཅས་མཐའ་འཁྱོངས་བྱས་ཏེ་དེ་བས་དྲང་སྙོམས་དང་། གཞུང་དྲང་། ཀུན་གསལ་བཅས་ཀྱི་ཁྲོམ་རའི་ཁོར་ཡུག་ཅིག་གཏོད་དགོས། རང་འགུལ་ངང་ཞབས་འདེགས་ཞུ་བའི་འདུ་ཤེས་ཟབ་ཏུ་གཏོང་བ་དང་། ལས་ཀའི་ལམ་སྲོལ་འཛུགས་པ། སྲིད་ཇུས་ལག་བསྟར་བྱེད་སྟངས་འཐུས་སྒོ་ཚང་དུ་གཏོང་བ་བཅས་བྱས་ཏེ། དམངས་གཉེར་ཁེ་ལས་ཀྱི་དངོས་ཡོད་དཀའ་ངལ་ཐག་གཅོད་བྱེད་རོགས་ཧུར་ཐག་བྱེད་དགོས། བདེ་འཇགས་དང་བརྟན་ལྷིང་གི་སྔོན་དཔག་དམིགས་ཚད་འགན་ལེན་བྱས་ཏེ། དམངས་གཉེར་ཁེ་ལས་མཁས་ཅན་གྱི་ཁྲིམས་དང་མཐུན་པའི་མི་ལུས་དང་རྒྱུ་ནོར་གྱི་ཁེ་དབང་འགན་ལེན་དང་། ཁེ་ལས་ཀྱི་ཁྲིམས་མཐུན་གཉེར་སྐྱོང་འགན་ལེན་བྱེད་དགོས། དམངས་གཉེར་ཁེ་ལས་ཀྱིས་ཁེ་ལས་ཀྱི་ཐོན་འཕར་ནུས་ཆེ་དང་ཁེ་ལས་ལས་བཟོའི་ཕན་བདེ་ཐོབ་ཐང་ལེགས་སུ་གཏོང་བ་དང་ཞིང་འབྲོག་པའི་འབབ་འཕར་ལ་སྐུལ་འདེད་གཏོང་བའི་དབར་གྱི་འབྲེལ་བ་ཐག་གཅོད་ཡང་དག་བྱས་ཏེ། དཔལ་འབྱོར་ཕན་འབྲས་དང་སྤྱི་ཚོགས་ཕན་འབྲས་གཉིས་ཀ་ཆེ་རུ་འགྲོ་བ་དང་། མཐོ་སློབ་སློབ་ཐོན་སློབ་མའི་ལས་ཞུགས་དང་ཞིང་འབྲོག་པ་ལས་ཞུགས་གཞན་སྒྱུར་ལ་སྐུལ་ཁྲིད་ནུས་ལྡན་ཐུབ་རྒྱུའི་རེ་བ་ཡོད་ཅེས་གསུངས་པ་རེད།
༼རྩོམ་སྒྲིག་འགན་ཁུར་བ། ༽
 
 
འབྲེལ་ཡོད་ནང་དོན།
 
 
Copyright @ China Association for Preservation and Development of Tibetan Culture ( CAPDTC )
འདིར་བཀོད་པའི་ཡིག་རིགས་དང་པར་རིས་ཚང་མའི་པར་དབང་ཀྲུང་གོའི་བོད་ལྗོངས་རིག་གནས་སྲུང་སྤེལ་མཐུན་ཚོགས་ལ་དབང་བས་
ཕན་ཚུན་གྲོས་མོལ་དབང་བཅོལ་མ་བྱས་གོང་ལ་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།
E-Mail:dk582002@yahoo.com.cn Tel:8610-58336005